Rabhadh Sábháilteachta um Thriomadóir Rothlaim: Baol ó Thine
Tá baol ó thine ann a d’fhéadfadh tarlú nuair nach ndéantar triomadóirí rothlaim a chothabháil ná a úsáid i gceart. Tá ComReg ag iarraidh feasacht a ardú mar chuid dá ról mar Údarás um Fhaireachas Margaidh faoin Treoir maidir le Trealamh Raidió chun sláinte agus sábháilteacht daoine, ainmhithe clóis agus maoine a chosaint
Molann ComReg duit an chomhairle thíos a leanúint chun a chinntiú go bhfuil do thriomadóir rothlaim in úsáid go sábháilte agat:
- Cláraigh fearas nua i gcónaí leis an monaróir ionas go bhfaighidh tú eolas cothrom le dáta faoi aon saincheisteanna a d’fhéadfadh a bheith ina gcúis le guais sábháilteachta. De ghnáth is féidir leat do chuid eolais teagmhála a chlárú leis an siopa ina gceannaíonn tú an táirge.
- Cinntigh go léann tú gach eolas agus rabhadh sábháilteachta atá sa lámhleabhar treoracha sula n-úsáideann tú an meaisín den chéad uair.
- Ba chóir líonolann agus clúmhach a ghlanadh amach as an scagaire agus thart timpeall an dorais tar éis gach úsáide.
- Bí ag faire amach do shnáithín, do dheannach, agus do shalachar ag carnadh timpeall ar an mbealach amach sceite agus ar na háiteanna mórthimpeall, agus glan na háiteanna seo go minic.
- Ná triail rudaí nach bhfuil nite a rothaltriomú, ar nós éadaí báite, mar gurbh fhéidir gur tháinig na héadaí seo i dteagmháil le ceimiceáin sho-lasta.
- Ná cuir stop leis an triomadóir rothlaim sula mbeidh an timthriall triomaithe críochnaithe, lena n-áirítear an timthriall ‘fuaraithe’. Más gá duit cur isteach ar an timthriall triomaithe, bain amach gach rud gan mhoill agus fág an doras ar oscailt chun ligean don fhearas fuarú.
- Nuair is féidir, díphlugáil an fearas thar oíche agus nuair a fhágann tú an teach chun an baol go mbeadh locht leictreach ina chúis le tine a sheachaint.
- Ná lig do leanaí an fearas a oibriú riamh.
- Cinntigh go bhfuil an fearas suite in áit ina bhfuil aeráil leordhóthanach, agus ná cuir triomadóir rothlaim riamh ar urlár atá clúdaithe le cairpéad. Cabhróidh an méid sin le cosc a chur ar róthéamh.
- Ná húsáid cáblaí sínteacha, cuibheoirí, nó il-phlocóidí riamh chun d’fhearas a nascadh le soláthar cumhachta, mar go méadaíonn sé sin an baol féideartha le haghaidh turraing leictreach agus tine.